واخيرا ودعت حب الشباب ،، علاجي عند الدكتور علاء الطباخ

قياسي

السلام عليكم

موضوعي انشالله يكون شامل و بالتفاصيل الي اذكرها ويفيدكم ويفيد اي بنت تسوي سيرج بقوقل لانه من جم سنه وانا على هالحال ادور مواضيع وكلها مبالغه وتفليم

موضوعي راح يشمل :



- بداية الحاله
- تجربتي الاولى
- تجربتي الثانيه
- تجربتي الثالثه والي انشالله ناجحه
- اعراض صارتلي


- اشاعات
- نصائح لكم

بداية الحاله

عمري 18
بيوم وليله قعدت من النوم لقيت جم حبه مر يوم يومين والحبوب تزيد مر اسبوع الا ويهي منقلب حتى امي استغربت قالت هذا عنقز لانه ولامره بحياتي طلعتلي حبه وحده لوول وعبالي حساسيه طنشت ،، ومادي شالسبب كلش ماكنت احط مكياج نهائيا ولا استخدم اشياء حق ويهي

تجربتي الاولى

بعد ماطنشت الحبوب ومر وقت عليها وماخفت رحت حق دكتور خاص حمد الغرير بعد مدح الناس وقالوا شاطر عطاني كريمات واشياء موضعيه لانه الحبوب اول مره تطلع فيني مايبي يعطيني اشياء قويه وقالي بعد مايخلص علاجج تين ومرت شهور ومافاد ولا شي فما رحت له

تجربتي الثانيه

عمري 19
خبيرة تجميل اشك فيها انها خبيرة تجميل المهم من هذيل الي ايون البيت ناسيه اسم المركز عطتني كريمات وخرابيط ودفعت فلوس واستمريت كله ع الفاضي ماكو نتيجه

تجربتي الثالثه : الروكتان

عمري 20
امدحتلي اختي الدكتور علاء الطباخ بمستوصف بوشهري رحت الموعد فحصني الدكتور وايد ارتحتله وحسيته فاهم وقالي حالتي بالظبط واحلى شي نفسيته حلوه ويعطيج وقتج وراحتج بالكلام وشجعني قالي فيج حب شباب عنيف على قولته وان العلاج الوحيد الروكتان خفت وبديت اساله عن وايد اشياء وكلام راح اقولكم اهم الاشياء بعدين بالنصائح المهم فترة العلاج تستمر 6 شهور كل شهر ونص اسوي تحليل واروحله وبس

غيرت الدكتور ورحت حكومي مو عيب بالدكتور بس عشان اوفر فلوسي دام متوفر بالحكومه لاني اول مره دفعت يمكن 85 دينار عالجت بمستشفى عبدالله السالم امراض الجلديه دكتور مصطفى يحيى الصراحه الدكتور كبير ومبين عليه مو فاهم وايد بس كملت عنده لانه مايبيله شي اعرف اقرا التحليل وعارفه الجرعه الي احتاجها

مرت 6 شهور بسرعه وخلصت العلاج من غير اي تعب وويهي من ثاني شهر راحت الحبوب نهائيا والاشهر الباجي ويهي كان يتقشر وحاليا ويهي تحسن حيل رد صافي بس بقت اثار ورديه خفيفه تحت الجلد الي يقرب يشوفها و حجزت موعد عند دكتور علاء الطباخ وللحين مايه الموعد بكمل عنده انشالله واشوف شنو الحل الاخير ثقتي فيه اكثر من الحكومه مابي يلعبون بويهي

والصراحه انا كلش ماكنت اهتم ماكنت اشرب ماي واكل فاست فود وماهتم بالترطيب بس الحمدالله ماصارتلي مشاكل

الاعراض الي صارتلي :

جفاف العيون اكثر شي ضايقني لاني ماهتميت بالترطيب وماكنت اشرب ماي وقطرتي ترطيب عادي مو عميق
جفاف الشفايف
جفاف البشره حيل
نزف خشمي يمكن 3 مرات بشكل خفيف
تساقط الشعر بس شوي مو ووايد بس لمه بديت احطله زيوت راح التساقط

الاشاعات :

بنات مالكم شغل بلي يطلعون اشاعات انا بسبتهم طوفت الوقت عشان ماخذ روكتان واخر شي كله جذب بجذب

في قالوا انه يسبب صلع من كثر تساقط الشعر الدكتور قالي جذب مستحيل نعالج مشكله ونسبب مشكله اكبر
جذب سالفة تجرح قرنية العين بسبت الجفاف
جذب سالفة عظامج تعورج لي درجة ماتقدرين تتحركين
جذب سالفة تلعب باعصابج وتخليج كله متضايقه ومتنرفزه
وماذكر بعد من كثر الاشاعات

نصيحتي لكم :

اول ماتبدا معاج الحاله سيده روحي عند دكتور مضمون
لاتحطين خلطات وبلاوي على ويهج حتى لو طبيعيه الدكتور حذر قال الحبوب تكون ملتهبه في اشياء تهيجها وفي بشرات تسوء الحاله وتتحسس
لاتشترين ادويه وخلطات من تاجرات وعطارين
لاتوهمين نفسج بأن عين هالسالفه صارت فيني وضايقتني امي تقولي عطوج عين وحطتها براسي انه وحده معطتني عين واهي السبب شي سلبي ويأثر ترا شي عادي حبوب تصير حق كل الناس خلكم من سوالف العين والافلام الهنديه
لايقصون عليكم ملوت الصيدليات ترا كله جذب دفعت شكثر فلوس على منتجاتهم والدكتور قالي مجذبين عليج معطينج اشياء مالها علاقه بحالتج

واخر شي اقولكم مالكم شغل بكلام الحريم سوي الخلطه الفلانيه ولاتستعملين هالدوا لايفتون على راسكم






اي سؤال عن الادويه او الكريمات او العلاج قولولي واجاوبكم


تعليق


الدكتور علاء يهبل خوووش دكتور ماشااءالله اكثر دكتور ارتحت له .. وفهمان


تعليق


تسلمين حبيبتي مشكورة على طرح تجربتج
ممكن عنوان العياده ورقمها؟ ابي اروح لدكتور علاء


تعليق


موضوع رائع


تعليق


تكفين انا الحين صاير فيني جذي كل يوم حبه يديده وويهي حالته حاله

واستغفر الله حاطه في بالي عين





كانت بشرتي صافيه وتهبل

تكفين ابي رقمه وعيادته

مشكوره وايد


تعليق


بنوته 86





ه من كثر ما الدكتور يهبل بخاطري امدحه اكثر بس خفت يقولون اني سكرتيرته واسويله دعايه


تعليق


انا بنتظر الشق الثاني من العلاج
ابشوف ايش بتسوين لعلاج الاثار




موفقه عزيزتي


تعليق


Whithered flower

الله يسلمج

فجرر

شكراا

سميره مملوحه

انشالله حساسيه مو اكثر احسن شي تسوينه سيده تروحين الطبيب

بنات ترا يطولون بمواعيدهم كله زحمه حجزوا من اليوم دقيت امس عطوني موعد 29 مارس






السالمية - تقاطع شارع عمان مع شارع بغداد - بجوار صيدلية بوشهري الإلكترونية

الهواتف *
الهاتف: 1877 داخلي: 290
النقال: 66129444
الفاكس: 25659172


تعليق


ظبية بوظبي

بالنسبه للأثار الدكتور الي بالحكومه قالي تستعملين جل دفرين لمدة شهرين وتعالي بس هذا العلاج النهائي





فعشان جذي برد حق دكتور علاء بشوف احتاج ليزر واسأله عن العلاج الحكومي واشوف شنو العلاج الانسب لي

واذا صار شي انشالله وتعالجت انزل موضوع يديد


تعليق


فديتش والله

عندي استفسار عاجل



جل ديفرين ما وصف لش معاه علاج ثاني او على الاقل كريم ضد التحسس عشان ممكن بيهج بشرتش ؟
ودرجه الندب عندش عميقه ولا متوسطه .. كثيره ولا شويه ؟
اعرف وحده في منتدى ثاني بعد نفسش طلب منها الدكتور تستخدم جل ديفرين لا وبعد اثناء كورس الروكتان






*
اما من ناحيه الليزر ما انصحش فيه
كثاار بنات ندموا انه تعالجوا بليزر فراكشنال .. هيج بشرتهم فردت لهم الحبوب وردوا ياخذون روكتان من اول وجديد
وشفت دكتور يقول اي يمكن لان الليزر حفز الغدد الدهنية

هذا غير بعد شفت ريفيوهات وحده اجنبيه تقول ان في فئه كبيررره ما استفادت من ليزر فراكشنال
هذا غير انه يشوي البشره شوي كنت اشوف بنات في قروب يتعذبون منه + سعره غاالي


احسن شي والي الحين صاروا الكل هاب عليه حتى الاجانب هو الديرما رولر
لانه يحفز الكولاجين فبتتعبى الندب + ما يرقق البشره مثل الليزر ويخليها محمره

ولتصبغات حلو لها تقشيرات كيميائيه


تعليق


ظبية بوظبي

فداج يا قلبي

بالنسبه حق الدفرين جل نفس الصوره الي حاطتها
كنت استعمله من الشهر الثاني لي اخر الرابع
بعدين قلت حق الدكتور بوقفه تعايزت قلت تقشير الدوا كافي
فالحين تحسفت لمه قالي استعملي بعد يخفف اللون يمكن لو مكمله لي اخر شهر جان بشرتي تحسنت اكثر

قبل عطاني كريم مرطب بس طبي المستشفى نفسها يسونه بس الحين كتبلي كريم مرطب اسمه بانثينول



وبالنسبه حق الاثار الي الحين بويهي نفس هالصوره الي على اليمين الي مكتوب عليها كوزمو لايف







واتوقع اهو كان قايلي الليزر اذا ويهج فيه حفر بس الحمدالله دققت بويهي مافي غير اثار بلون وردي مافي حفر
وعموما سالفة الليزر مابيها حتى لو قالي و الديرما رولر مو سامعه عنه بسوي سيرج


تعليق


حبيبتي مشكوووره علي ذكر تجربتج الله يعطيج الف عافية.
انا احس خلاص تعبت ببجي من بشرتي ماخليت عياده مارحتلها ابي علاج نهائي انا مشكلتي:




سواد حوالين العين
خطوط تحت العين
اثار الحبوب
بس مليت لي متي
ماتعرفين شنو علاجاته هالاشياء .


تعليق


فديت قلبش والله
اتمنالش تنعمين ببشره مخمليه ان شاء الله
انا تقريبا نفس حالتش
وما دام ان هذي بس حاله بشرتش فانتي بس ب كريمات تقشير نفس الديفيرين بتفيدش





**

كريم بانثول هذا زمااان كانت المستوصفات يصرفونه عندنا لكن الحين لا يمكن عشان دخلت شركه ونافسته فالسوق

وهو رهيب لان عابره سبيل هالبنت الي مشهوره فالنت قالت انها تخلطه مع لوشن فازلين البنفسجي رينول وترطيب جسمها قالت شال لها اثار الحبوب الي في ظهرها رهيب فخاطري لو كان ينباع عندنا بس عجزت القاه لازم اطلب ومافيني كل شوي اطلب



***

حنانو

الهالات ينفع لها خيار وبطاط بس محد فاضي فسويلها جل البواسير زين له والعارضات يسونه

والخطوط الي تحت العين قصدش تجاعيد ؟ استخدمي لها زيت الجوجوبا النقي الاوريقنك بس مب يوميا لان اي كريم او اي زيت كثرته يسبب انتفخات / جيوب

اثار الحبوب سويلها دريما رولر انتي بنفسش حتى تقدرين تسوينه


تعليق


ظبية بوظبي حبيبتي مشكوووره علي ردج علي ماقصرتي والله ... اي مفكرة بالرول احس يفيد


تعليق


حنانو

االله يسلمج
والله مادري حبيبتي الاثار توني باديه ادور علاج

بس حق سواد تحت العيون

انا امي تتعامل مع مركز تجميل اسمه فلورنسا ومرتاحه عليه تشتري منهم شغلات حق السواد والبشره





او تقدرين تدورين بقوقل اكثر شي مادحينه او تروحين حق دكتور شاطر يفهمج شلون تتخلصين منهم


تعليق

---

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>